За што ви е потребна медиумската писменост, како таа се однесува на образованието, медиумите, филмот, библиотеките, што значи да си новинар, одговорност во онлајн просторот, говор на омраза, гласини, интеркултурни комуникации, се дел од прашањата на кои Мрежата за медиумска писменост ќе се потруди да одговори преку својата најнова онлајн кампања која почнува денеска.
Од Мрежата за медиумска писменост појаснуваат дека во следните десет седмици, секој работен ден, ќе се споделува по еден постер со информации со цел да се подигне свеста за потребата од критичко користење на медиумите и медиумските содржини.
-Со кампањата се отвораат два нови канали за комуникација на Мрежата со граѓаните преку Твитер @MediumPismenost и на Инстаграм @mrezazamediumskapismenost, односно постерите ќе бидат објавувани преку нив, како и преку Фејсбук пејџот на Мрежата @MrezaZaMediumskaPismenost, се наведува во соопштението од Мрежата за медиумска писменост.
Кампањата се реализира по повод четвртата годишнина од формирањето на Мрежата, која формално беше основана на 27 април 2017 година, на иницијатива од Агенцијата за аудио и аудиовизуелни медиумски услуги.