Египетските државни медиуми јавија дека соборениот исламистички претседател Мухамад Морси денеска бил префрлен во Полициската академија во Каиро каде што треба да почне судењето против него.
Морси и 14 други членови на Муслиманското братство се соочуваат со обвинување за иницирање насилства и судири пред претседатлската палата во декември 2012 година. Тие можат да бидат осудени на казна доживотен затвор.
Судските рочишта ќе се одржат под зајакнати мерки за безбедност во полициската академија, која се наоѓа веднаш до затворот „Тора“ во Каиро. Морси ќе биде транспортиран со хеликоптер до и од импровизираната судница. Полицијата планира денеска да распореди 20.000 свои припадници низ улиците на Каиро.