Основното јавно обвинителство за гонење на организиран криминал и корупција денеска до Кривичниот суд поднесе Обвинителен акт против шест лица осомничени во предметот „Еразмус“.
„Обвинителството ги товари обвинетите врз основа на докази што го потврдуваат основаното сомневање дека во повеќе наврати во подолг временски период, односно во текот на 2015 и 2016 година како лица вработени на Економскиот факултет при Универзитетот „Св. Кирил и Методиј“ – Скопје, искористувајќи ја својата положба сториле кривични дела. Обвинетите Б.Ш и С.Р се товарат за сторено кривично дело – Примање поткуп, лицето Д.Ј. се обвинува дека сторило кривично дело – Примање поткуп и Примање награда за противзаконито влијание. Обвинетите Љ.Ј. и С.Д. се товарат за сторено кривично дело – Злоупотреба на службената положба и овластување. Со обвинителниот акт се обвинува и лицето Д.Д. за сторени три кривични дела- Давање поткуп“, пишува во соопштението од Јавното обвинителство.
Основното јавно обвинителство за гонење на организиран криминал и корупција ја запре истражната постапка за лицето Т.Ф. ценејќи дека нема докази кои потврдуваат дека осомничениот го сторил кривичното дело.
Во продолжение видео од акцијата на Јавното обвинителство и МВР, кои на 6 јуни упаднаа на Универзитетот Свети Кирил и Методиј и вршеа претреси во кабинетите на обвинетите професори и вработени на Економскиот факултет во Скопје.