Во новиот број на универзитетското списание за литература „Хаваи ривју“ се објавени избрани песни од Јовица Тасевски–Етернијан, во оригинал на македонски и препеани на англиски јазик, заедно со био-библиографска белешка. Поезијата на македонскиот автор ја препеа познатата американска поетеса Џудит Скилман, која во белешката истакнува дека „песните на Јовица Тасевски–Етернијан се карактеризираат со оригинални слики, богат фигуративен јазик и повеќеслојни значења; тие извираат од моќна поетска имагинација“.
Списанието „Хаваи ривју“ излегува континуирано повеќе од четири децении и го издава Универзитетот на Хаваи во Маноа со седиште во Хонолулу. Во ова реномирано списание што е вклучено и во програмата по креативно пишување досега биле претставени со избрани песни голем број еминентни автори меѓу кои се и Висенте Алеиксандре и Томас Транстромер уште пред да ја добијат Нобеловата награда за литература, како и добитниците на „Златен венец“ В.С. Мервин и Маргарет Атвуд, а Јовица Тасевски–Етернијан првиот македонски автор чија поезија е објавена во „Хаваи ривју“. Главна уредничка е поетесата, есеистка и книжевна критичарка м-р Линли Шејмат Лиз која има дипломирано компаративна книжевност на Универзитетот во Беркли, магистрирала на Универзитетот во Ерусалим (блискоисточни студии) и на Квинс колеџот во Њујорк (креативно пишување и книжевен превод), а од 2016 година живее во Хонолулу каде предава креативно пишување на Универзитетот на Хаваи.
Поезијата на Јовица Тасевски–Етернијан е преведена на дваесетина јазици и објавена е во списанија и антологии во околу триесет држави, меѓу кои и во списанијата за литература што ги издаваат Универзитетот на Арказас и Универзитетот „Роџер Вилијамс“ во САД и Универзитетот Диакин во Австралија.