Седумнаесет лица денеска се изведени пред истражен судија, а против нив е поднесена кривична пријава за криумчарење цигари од Македонија во Бугарија. Меѓу пријавените е и еден полициски службеник вработен во граничната полиција. Тројца од осомничените не и биле достапни на полицијата.
– Утрово заедно со кривичната пријава и обезбедениот доказен материјал, 17 лица кои се дел од дваесетчлената организирана криминална група инволвирана во криумчарење на цигари беа изведени пред истражен судија, изјави на прес-конференција министерката за внатрешни работи Гордана Јанкуловска.
Тројца од осомничените вчера не и биле достапни на полицијата и против нив ќе се преземат дополнителни мерки за пронаоѓање.
Криминалната група, како што рече Јанкуловска, е составена од 19 македонски и еден бугарски државјанин, и се товари дека во периодот од септември 2010 до септември 2011 организирала вкупно 12 нелегални транспорти на цигари од Република Македонија кон Република Бугарија.
Акцијата беше реализирана во Скопје, Тетово и повеќе други градови низ источна Македонија и притоа беа приведени и организаторите и членовите на групата, која според Јанкуловска, била добро структуирана.
Полицијата вчера извршила претрес и во куќите на сега уапсените и осомничени за кривично дело криумчарење. Според МВР, биле пронајдени три пакети рефус цигари, неколку килограми марихуана, 100 пакети енергетски пијалак, нелегално внесен од Косово, над 15.000 евра, 341 штеки цигари без акцизни маркички, 3.983 македонски акцизни маркички за кои се претпоставува дека се фалсификувани и едно патничко моторно возило, користено за вршење на кривичните дела. Во еден хангар полицијата пронашла и импровизирана машина за пакување цигари.
Од 2006 година наваму, откриени се преку 600 кривични дела од оваа област за кои биле пријавени над 770 сторители. Во полициските акции биле запленети приближно 22,5 тони дробен тутун, 25 тони различни цигари и над 330.000 штеки цигари.