Владата на Полска објави водич за граѓаните што содржи упатства како да се подготват за кризна ситуација, како што е војната.
Водичот наведува што да се прави во случај на напад со различни видови оружје, од конвенционално преку хемиско до нуклеарно. Опишани се и системите за јавно предупредување што се користат во такви случаи.
Граѓаните се советуваат да се снабдат со вода, храна, лекови и батериски светилки во случај на прекин на електрична енергија.
Полската Влада наведува дека мора да ги подготви граѓаните за различни сценарија, но негира дека водичот е поврзан со војната во Украина. Претходните слични водичи вклучуваа ситуации како што се поплави и студено зимско време.
Но, заканата од руска инвазија, секако, е во мислите на дел од граѓани во Полска, која граничи со Украина. Иако Русија ги фокусираше повеќето напади на северот, југот и истокот на Украина, руските сили извршија неколку напади врз градот Лвов, кој се наоѓа на само 60 километри од полската граница.
Засега нема конкретни информации дека Русија планира да ја нападне Полска, исто како што ниту Полска очекува напад, но се стравува дека Москва би можела да ја прошири својата инвазија во соседните земји.