Полскиот парламент синоќа изгласа доверба на владата на премиерот Доналд Туск, по скандалот со тајното снимање приватни разговори на високи владини службеници. Гласање доверба на владата побара премиерот Туск, пренесува Дојче Веле.
Скандалот кој ја погоди владата на Туск го објави магазинот „Впрост“. Овој медиум објави снимки кои ги засрамија полските функционери. Прво тој објави снимки на кои шефот на централната банка му вели на министерот за внатрешни работи дека ќе ја поддржи економската политика на владата, ако оставка си поднесе министерот за финансии. На друга снимка е министерот за надворешни работи Радослав Сикорски кој ги нарекува „безвредни“ полските врски со САД и го нарекува британскиот премиер Дејвид Камерон „некомпетентен за прашања поврзани со ЕУ“. Приватните разговори се случиле во многу популарен варшавски ресторан во минатите 18 месеци. Опозицијата веднаш го повика Туск да си поднесе оставка, но тој одби да го стори тоа.
„Не знам која азбука беше користена за да се напише ова сценарио, ама немам сомнеж кој ќе профитира од него“, рече Туск пред парламентарците веројатно алудирајќи на руската азбука.