Храната на македонските пазари е безбедна. Ова за НОВА го изјави Зоран Поповски, новиот директор на Агенцијата за храна.
„ Ги уверувам граѓаните дека храната која се увезува и се извезува од државата е безбедна. Не се согласувам со тоа дека на македонските пазари завршуваат небезбедни производи бидејќи сите сме потенцијални конзументи. Ние правиме контроли и на граничните премини и директно кај фирмите, изјави за НОВА Поповски.
Тој смета дека информациите што ги добиваат граѓаните дека во некои прехрамбени производи се откриени големи количини на пестициди, афлатоксини или опасни бактерии, се неосновани бидејќи сите анализи покажале дека во Македонија нема небезбедна храна.
„Не се согласувам дека агенцијата не информирала на време за вакви работи бидејќи секогаш постои оној систем на повлекување на храната доколку се констатира дека нешто не чини, рече Поповски.
На прашање на НОВА, што ќе се презвеме со зголемената примена на пестиди во одредени региони како што е ресенскиот со јаболките, или тиквешкиот каде грозјето се прска со пестициди без мерка, заради пласманот, Поповски со одговор:
„Контролата ја прави Државниот инспекторат за земјоделие, а одговорноста на Агенцијата е кога храната ќе премине кај граѓаните. Но, не се само пестоцидите во прашање, граѓаните треба да знаат дека е многу важно и правилното миење на храната“, одговори Поповски.
НОВА веќе објави дека вкупно 42 прехрамбени производи со потекло од Македонија полни со пестициди, канцерогени материи и опасни бактерии биле откриени во земјите на ЕУ во последните години. Околу 40 производи опасни по здравјето на граѓаните пак, биле увезени од други земји во Македонија. Податоците се земени РАССФ, системот на ЕУ, за брзо алармирање за безбедност на храна. Таму не се откриваат имињата на фирмите , само македонските производи се евидентираат како проблематични. Македонските контроли очигледно во овие 82 случаи направиле превид.
Станува збор за различни производи што секојдневно се употребуваат во исхраната, домати, пиперки, краставици, грозје, јаболки, печурки, потоа полжави, десерти, чоколади, сладолед, вино, енергетски пијалоци, желе бонбони. Некои од пратките содржеле големи количини пестициди, други содржеле опасни бактерии, трети канцерогениот афлатоксин или пак на декларацијата не било нагласено дека содржат алергени, кои може да го загрозат здравјето и животот на луѓето кои се алергични на нив.
Од анализите пак што во јули започна да ги прави Фитосанитарната лабораторија се покажало дека во македонските производи кои досега биле испитани(300) имало три пати повеќе производи со прекумерно количество на пестициди во себе од што е тоа случај во една од земјите на ЕУ, Италија.