Во Загреб е прогласена состојба на одбрана откако е забележано зголемување на водостојот на реката Сава. Поради обилните дождови и топењето на снегот во текот на ноќта биле поплавени голем број на станови, канцеларии и дуќани, а пожарникарите имале 170 интервенции заради вадење на водата од објектите. Состојбата будно ја следи Центарот за управување во итни состојби.
На целата територија на Загреб има прелевање на водата, така што некои улици се затворени, а на поголемиот дел од нив сообраќајот се одвива отежнато.
-Нема место за паника, нема опасност од поплава во Загреб бидејќи градот има квалитетни насипи уште од 1964 година, освен во ситуација когс големиот водостој би се здружил со нешто друго. Ситуацијата е критична во Сисак, бидејќи големиот бран на вода оди натаму, изјавил, Павле Калиниќ од Центарот за управување со итни ситуации.
Според информаците од хрватските медиуми во Сесветски Краљевац, веќе се поплавени 70 –тина куќи, а во Дуго Село водата веќе е навлезена во подрумите. Најкритично е во Петровина, каде што водата која се излила од коритото ги поплавила куќите.
Доколку се зголеми нивото на водата за уште 15 сантиметри ќе биде прогласена вонредна состојба.