Наскоро следува поскапување на алкохолот и цигарите, со оглед на фактот што власта планира зголемување на акцизите и за алкохолните пијалоци и за тутунот.
Според најавите, акцизата за пивото ќе се зголеми од три на четири денари по литар, додека кај другите алкохолни пијалоци од 300 на 340 денари за литар чист алкохол.
Со новите измени во Законот за акцизи, се проценува дека зголемувањето на акцизите ќе значи и поскапување на алкохолните пијалоци за најмалку 10 отсто.
Пивото ќе поскапи, а зголемувањето на цените е предизвикано од владината намера за зголемувањето на акцизите, посочуваат од скопска Пивара. Генералниот директор на Пивара, Јаак Микел посочува дека тие веќе ја известиле Владата за она што ќе се случува по зголемувањето на акцизите.
За колку ќе поскапи и како тоа ќе се одрази врз работењето на компанијата сѐ уште нема точни проценки, но менаџментот се надева на дијалог со владата.
„Секое зголемување на акцизите повлекува и зголемување на цената на производите. Па така, може да очекува дека цената на пивото ќе се зголеми. А, секако кога се зголемува цената на пивото или било кој друг производ тоа влијае на потрошувачката, односно на побарувачката на тој производ.
Многу е рано да се каже какво ќе биде тоа влијание од овој чекор, но секако дека ќе има влијание. Ја известивме Владата за нашата позиција, свесни сме дека тоа е веќе одлучено, но ние се надеваме дека ќе можеме да продолжиме со дијалогот со Владата за да овозможиме раст на индустријата на производство на пиво во земјата, рече Јаак Микел, генерален директор на Пивара.