По вчерашниот најркрвав ден од почетокот на протестите во Украина, претседателот Виктор Јанукович тврди дека постигнал договор со опозицијата за решавање на кризата. Според наводите, преговорите траеле до рано утрово со посредство на претставници на ЕУ.
Претседателот ова го објавил на својата веб-страница, но деталите се очекуваат во наредните два часа.
Украинскиот весник Правда пишува дека овој договор би значел предвремени избори во декември, враќање на Уставот од 2004 година и формирање нова коалициска Влада.
Договорот за кој зборува Јанукович доаѓа откако во вчерашните судири загинаа најмалку сто луѓе, во и околу Плоштадот на независноста.
Владините безбедносни сили донесоа снајперисти и повеќе од 500 луѓе се повредени во превирањата во главниот град на земјата, пишува Правда.
Парламентот на Украина минатата ноќ усвои посебен законски пропис, со кој стана незаконско присуството на вооружените безбедносни сили на Плоштадот на независноста и воопшто полицијата да биде вооружена.
Иан Трејнор од Гардијан го опишал законскиот пропис понуден од опозицијата во парламентот како „долга листа на желби“. Сепак, не се знае дали предлог-законот е потпишан и станал закон.