Посетата на Ангела Меркел на САД е како кризен состанок. Главна тема ќе биде драмата околу Украина. Но, германско-американското партнерство е пред предизвик и поради аферата со НСА и проектот за трансатлантски пазар, објавува Дојче веле.
Ангела Меркел имала и попријатни посети на САД. Нејзе денеска и утре (02. и 03.05.) ја очекува посета на лидерот кој среде криза стана како отуѓен пријател. По аферата со НСА, сега се случува украинската криза, а овие кризи ги ставија двете земји пред искушенија. Според Најл Гарднер од фондацијата „Херитиџ“, постои опасност односите меѓу Германија и САД да бидат повторно разнишани.
„Има голем јаз меѓу Берлин и Вашингтон како да се постапи со Русија“, вели Гарднер. Експертот за Европа на конзервативната вашингтонска тинк-тенк организација е јасен во изјавата за Дојче веле: Германија и одредени европски земји „во однос на Русија водат политика на попуштање. Пред се’ поради економската зависност при снабдувањето со енергенси“.
Новата шефица на „Германскиот маршалов фонд“ Карен Донфрид енергично се противи на таквата оценка и додава:
„Верувам дека германско-американската координација досега е многу добра. Европејците имаат значајни енергетски и трговски врски со Русија. И покрај тоа, тие сакаат да извршат притисок врз Русија“, оценува Донфрид.
Украинската криза е на врвот на агендата на Ангела Меркел за време на посетата на САД. Канцеларката во Вашингтон нема да се сретне само со различни проценки и очекувања од Европа, Германија и од неа лично, туку ќе се соочи и со претседател кој е под внатрешнополитички притисок за поостро да се постави во однос на Русија. Тоа треба да го забележи германската канцеларка.
„Оваа средба доаѓа навистина во вистинско време и е многу значајна“, смета Хедер Конли од вашингтонскиот „Центар за стратегиски и меѓународни студии“ (ЦСИС). Двајцата лидери се среќаваат во време кога „политиката на Западот во однос на Русија е дојдена до драматичен крај. Мора да се развие една нова политика. Германската улога притоа е неверојатно одлучувачка за постигнување успех“, оценува експертката за Германија во тинк-тенк организацијата.