И понатаму трае потрагата по преживеани по бродската несреќа која се случи на јужниот брег на Јужна Кореја, но малку надеж за пронаоѓање на преживеани. Силните струи, дождот и слабата видливост ја попречуваат потрагата.
Како исчезнати сѐ уште се водат 287 патници, повеќето од нив средношколци кои патувале на екскурзија.
Досега се идентификувани телата на девет жртви, меѓу нив пет ученици и двајца нивни учители, но очекувањата се дека бројот на жртвите драматично ќе порасне поради долгиот период кој, евентуалните преживеани, го минале во трупот на бродот или во студените морски води.
На траектот имало вкупно 475 патници, од нив 325 ученици кои патувале на екскурзија кон блискиот туристички остров. Нивните родители се собраа на повеќе места во Сеул и на островот Јиндо во чија близина потона бродот, во очекување на вести за судбината на децата. Многумина од нив се лути и револтирани кон властите.
Во меѓувреме, повеќе од 400 спасувачи се ангажирани во водите. Властите планираат да го подигнат бродот со специјални кранови, но според проценките, за тоа ќе им треба најмалку уште еден ден. Нуркачите се обидуваат од вчера да влезат во трупот на бродот во потрага по преживеани, но силните морски струи ги оневозможуваат во мисијата.