Оваа година водевме дисциплински постапки против пет јавни обвинители кои сториле повреди во текот на работењето, рече државниот јавен обвинител Љубомир Јовески на денешната онлајн средба со новинарите.
Притоа, тој посочи дека еден обвинител од ОЈО Скопје, кај кого било утврдено нестручно работење, поднел оставка која ја констатирал Советот на јавни обвинители.
Јовески рече дека е донесен Правилник за следење на квалитетот на работењето на јавните обвинители и нивното оценување, со што ќе се подобрува квалитетот на работењето. – Ќе се оценува работата на секој обвинител посебно, квантитативно и квалитативно, рече Јовески.
На брифингот Јовески посочи дека 2020 година е тешка година за сите, исполнета и со многу предизвици за јавните обвинители.
– Нашата надлежност и предмет на работа бара постојан континуитет, целосна посветеност, лична директна комуникација со многу луѓе. Надлежни сме за гонење на криминалот, а тој не запира, дури и кога има пандемија. Обврзани сме со рокови во преземањето на нашите дејствија, на целосно прибирање на материјални и вербални докази за да имаме издржани обвиненија, рече Јовески.
И во услови на пандемија, како што додаде, со поинаква организација на работата, Обвинителството обезбеди непреченото одвивање на истрагите и постапките по другите предмети, почитувајќи ги целосно здравствените протоколи.
– Во оваа година обвинителствата постапуваа против над 25.000 полнолетни сторители на кривични дела. Само за време на вонредната состојба беа поведени и се завршени постапки против 3.500 лица за непостапување според здравствените прописи, истакна Јовески.
Обинителството, како што додаде тој, почитувајќи го начелото за презумпција на невиност ги објавува сите информации, за кои нема законска пречка и кои нема да наштетат на постапката. Само во оваа година, како што посочи, објавени се 825 соопштенија, што е двојно повеќе од претходната година, а покрај тоа редовно одговарале на прашања за кои јавноста имаше интерес.
Во оваа прилика Јовевски потсети дека со години Јавното обвинителство има недостаток на материјални и човечки ресурси, со што многу им било отежнато работењето.
– Меѓутоа сакам да истакнам дека годинава беа избрани нови 18 јавни обвинители, а во завршна фаза е постапката за вработување на 70 работници на различни работни места од кои повеќето се неопходните јавно-обвинителски стручни соработници. Овие нови вработувања значително ќе ги подобрат капацитетите на јавното обвинителство, но сакам да кажам дека неопходно е и натаму да се засилуваат човечките ресурси во обвинителството, нагласи државниот јавен обвинител.
Од не помало значење, како што рече тој, е што во оваа година профункционираа четирите истражни центри во Основното јавно обвинителство за гонење организиран криминал и корупција и основните јавни обвинителства во Скопје, Куманово и Тетово.
Јовевски посочи дека во годинава која изминува со средства од фондовите на Европската унија целосно се реновирани просториите на девет основни јавни обвинителства, а две обвинителства добија нови простории.
– Во втората половина на годинава започна примената на новиот Закон за јавно обвинителство со кој се унапредува организацијата и работењето на Обвинителството. Значајно е што се гарантираат 0,4 проценти од Буџетот за работа на обвинителствата, истакна Јовески.
Имајќи ја предвид состојбата во државата предизвикана од пандемијата, за 2021, како што рече Јовески, е обезбеден Буџет на јавното обвинителство во висина од 0,2 отсто. – Да нагласам дека треба сите да бидеме солидарни и да помогнеме во заложбите за справување со потешкотиите предизвикани од опасниот вирус, додаде тој.
Jавните обвинители, како што истакна Јовески, постапуваа и превземаа дејствија и по предметите преземени од Специјалното јавно обвинителство, со што во неколку предмети се поднесени обвиненија или други одлуки согласно доказните материјали, а продолжија и со застапување по предметите по кои претходно беа поднесени обвиненија.
– Јавно сакам да кажам дека Обвинителството постапува непристрасно и неселективно се гонат сторители на кривични дела. Обвинителството на овој начин ќе продолжи да работи и следната година, рече државниот јавен обвинител Јовески посакувајќи во новата 2021 година добро здравје, успеси и благосостојба, а воедно упати и апел за одговорно однесување кон здравствените прописи за да можеме брзо да се вратиме во редовни услови на живеење.