Повторно е каменувана куќата на актерот Петар Стојковиќ. Синоќа по 23 часот по вторпат се собрале група млади луѓе пред домот на актерот и почнале да фрлаат со камења по што веднаш избегале, јави Стојковиќ на неговиот Фејсбук профил.
Тој ја известил полицијата која го евидентирала случајот. Нема повредени и материјална штета, но затоа Стојковиќ им упати порака на ЛГБТ-фобите
„Ме мотивирате и ме стимулирате уште поревносно да се борам за почитување и унапредување на човековите права и слободи во нашата држава“, пишува актерот кој важи за голем борец за правата на геј лицата.
Ваквите инциденти се случуваат неколку седмици по објавувањето на неговата колумна кон крајот на јуни, во која тој јавно призна дека е хомосексуалец, после што беше каменувана неговата кука.
Неговото прво интервју после признанието за сексуалната определеност беше за НОВА, кога тој порача дека е свесен за ризиците и подготвен да ја плаќа цената како борец за основните човекови слободи и права, кои во Македонија се загрозени, додека властите не преземаат ништо, за што се силно критикувани не само од македонските активисти, туку и од релевантни владини и невладини институции и организации.