Група демонстранти организирана од „Веритас“ повторно ја окупира влезната врата од дворот на општината Центар, каде што се држат седници на советот.
Забележително е и присуство на вработени во јавната и државната администрација и граѓани кои што не се жители на општина.
Седницата е закажана за во 13 часот и на неа нема точка на дневен ред со која се предвидува стопирање на изградба на црквата Св. Константин и Елена.
Во текот на вчерашниот ден, претседателот на Советот, Мирослав Шиповиќ, телефонски го известил координаторот на советничката група на ВМРО-ДПМНЕ дека денеска ќе се одржи седница.
Советниците од ВМРО-ДПМНЕ одбија да ги примат и писмените покани за одржување на седницата.
Вратите на Општината се заклучени за да не може да дојде до насилно упаѓање на демонстранти како што се случи во петокот, но ова е преземено по барање и укажување на полицијата.
Од кабинетот на Жерновски велат дека градоначалникот не е запознает дека, како што пишуваше еден портал дека на еден од вработените му се слошило.
Затоа го повикуваат порталот да посочи за кој вработен се работи за да може веднаш да му обезбеди итна медицинска помош.
Според нив не се точни информациите на порталот дека има некави тешки притисоци кои се вршат врз вработените. Општината и денес функционира во полн состав.