Повторно гори трска во Охридското Езеро, овој пат во близина на болницата „Свети Еразмо“, објави портоалот Охрид прес.
На терен е екипа на охридската противпожарна единица.
Граѓанското здружение Охрид СОС вчера објави дека е опожарена трската и во населбата Воска. Оттаму предупредуваат дека од година во година трската на овој потег станува сѐ поретка и поретка, а и рибниот фонд се намалува.
-Напати се забележуваат и лица внатре во трската, најверојатно вршат криволов со пушка харпун. Порано и лебеди знаеа тука гнездо да створат, години уназад тоа нешто го нема. Она што е исто така алармантно е инертноста на минатата, а и на оваа власт тие крајно незаконски и нечовечни дејанија да ги спречат така што сериозни истраги ќе спроведат и сторителите ќе се казнат. Освен ако и самите тие власти не вмешале прсти во овие ужасија, оти не заборавајте колку тоа корумпираноста и натаму е на високо ниво, велат од Охрид СОС.
Тие и на почетокот на овој месец во повеќе наврати алармирираа дека се пали трската во орхидско – струшкиот регион, а притоа властите не преземаат мерки.
Основното јавно обвинителство од Струга вчера против двајца осомничени започна постапка заради постоење основано сомнение за сторено кривично дело – Оштетување или уништување на добра под привремена заштита или културно наследство или природни реткости по член 264 од Кривичниот законик, како и против инспектор по природа од Министерството за животна средина за сторено кривично дело – Попречување на правдата од член 368-а од Кривичниот законик, бидејќи одбил да излезе на самото место во моментот кога се сечела трската и да преземе дејствија по барање на јавниот обвинител.