Работните групи кои работат на спроведувањето на договорот од Пржино, според најавите, денеска на дневен ред повторно ќе го имаат прашањето за специјалниот јавен обвинител, кој треба да биде избран најдоцна до 15 септември.
Питер Ван Хојте кој е олеснувач во разговорите меѓу партиските работни групи, по вчерашната петчасовна средба изјави дека бил постигнат сериозен напредок за изборниот законик.
-Морам да кажам дека има сериозен напредок- разговорите изминативе неколку дена беа многу продуктивни и конструктивни како и преговарачите кои давале огромен напор за да се постигне резултат, изјави белгискиот експерт Питер ван Хојте одбегнувајќи да прецизира во кој дел од дискусијата е направен напредок а во кој има се уште потешкотии да се доближат ставовите на полтичките партии.
-Техничките детали треба да ги разработат техничарите, но за политичкиот договор сме многу блиску до солиден договор за сите проблеми, рече Ван Хојте.
Што се однесува до преговорите за специјален јавен обвинител, меѓу имињата за предлог на опозицијата кои досега неофицијално се споменуваа беа професорите Гордан Калајџиев и Гордана Бужаровска, aнтикорупционерката Слаѓана Тасева, како и екс-јавниот обвинител Стеван Павлевски. Не е исклучено опозицијата да одбере специјален обвинител кој веќе работи во Обвинителството. Иако постоеја информации дека не е исклучено и името на екс-обвинителот и сегашен адвокат Јован Трпеновски, сепак, просторот за маневр беше стеснет, со оглед на фактот што Трпеновски е лустриран и отуука, не може да извршува јавна функција.
Извори за НОВА изјавуваат дека разговорите опозиција- потенцијални кандидати веќе се водат, а едно од барањата на опозицијата е елаборирање на план и методи за работа од страна на кандидатите. Освен тоа, опозицијата имала средби со веќе постоечките обвинители, а некои од нив покажале подготвеност за соработка и кооперативност во однос на идното работење на специјалниот јавен обвинител, кој ќе биде задолжен за истражување на лентите од преслушување и отвореање евентуални истраги доколку се покаже дека постојат докази и оправданост за истражни постапки.
Професорот Гордан Калајџиев во интервју за НОВА во вторникот изјави дека специјалниот јавен обвинител не смее да се раководи според ничии партиски интереси и желби, без оглед дали би станало збор за опозициската СДСМ или владејачката ВМРО-ДПМНЕ. Калајџиев, анализирајќија постоечката констелација на односи, особено релацијата судство-власт, изјави дека специјалниот јавен обвинител ќе има прилично тешка работа да се справи со потчинетоста и клиентелизмот кој владее во судската фела, кога станува збор за нивната поврзаност кон власта и оттука, функционирањето на обвинтелот ќе биде долг и мачен процес, кој нема да заврши до изборите, ниту пак може да се очекуваат спектакуларен исход токму до изборите.