Дефект во мрежното поврзување во компјутерскиот систем направи хаос на повеќе скопски клиники денеска. Поради прекин на мрежната конекција, до 14 часот не функционираше системот за наплата и внесување на податоци на пациентите, што создаде револт кај болните и нервоза кај вработените.
Прекин во мрежното поврзување имало меѓу Клиниката за очни болести, Гастроентерохепатологија, кардиологија, лабораторијата и други клиники. Пред шалтерот на Биохемиската лабораторија на Интерните клиники само што не дојде до тепачка, револтирани и лути пациенти викаа на вработените кои се обидуваа да воведат ред, иако немаше како да го регулираат тоа комјутерски.
Медицинскиот персонал успеа некако да ја смири ситуацијата но, гужвата беше огромна. Луѓе во инвалидски колички, неподвижни, тешко болни чекаа на топлото време да бидат примени, да им се земе крв за анализа.
„Чекам од утринава по жешкото време, два пати ми се слоши, болна сум. Не знам што се случува но, ова е ужасно луѓето се истепаа пред шалтер“ објаснува за НОВА пациентка од Скопје.
Според информациите, различни фирми го вршат одржувањето на компјутерските системи на Клиниките. Наводно до прекин дошло од некој кабел на Клиниката за очни болести.
„ Беше страшно, се блокира се, не можевме да издаваме пресметки да внесуваме податоци. Но, успеваме некако да ги смириме пациентите, на дел од нив ќе им биде наплатено утре кога ќе дојдат по резултатите.Од фирмата што го одржува системот ни објаснија дека се работи за дефект во мрежната конекција меѓу клиниките, не е софтверски и не е поврзано со „Мој термин“, изјави за НОВА, доктор Соња Кузмановска директорка на Клиничка биохемија.
И во Министерството за здравство потврдија дека не се работи за електронскиот систем „Мој термин“, иако често се создаваат проблеми со него, паѓа системот или доаѓа до блокирање. Во таква ситуација ништо не функционира, лекарите не можат да внесуваат податоци, да прегледуваат, шалтерите се блокираат, а пацинетите чекаат безпомошно по болничките ходници.