Претставата „Аферата Елсинор“ во режија и текст од Љубиша Георгиевски премиерно ќе биде изведена задутре во новиот објект на Македонскиот народен театар (МНТ).
На денешната прес-конференција по повод премиерата, режисерот Георгиевски се заблагодари на Министерството за култура за субвенцијата со која е финансирана претставата на, како што кажа, неговата прослава, 55 години труд и 77 години живот (77/55).
– Текстот на претставата, јас би го нарекол дијалог со Шекспир во вид на пиеса на тема случајот Елсинор. Самата претстава е еден обид на форензичка анализа, да се види кој, како и зошто загинал таму, истакна Георгиевски. Посочи дека структурата е тројна во едно, која трае два часа и претставува телеграфска претстава.
– Да се прераскаже трипати Хамлет за два часа е навистина подвиг. Во првиот дел на претставата е сведочењето на кралот на Данска Клаудиј, во вториот дел се сведочењата на Гертруда, кралицата на Данска и третиот дел е според изјавите сведочењата и делириумите на свршеницата Офелија, рече Георгиевски.
Владо Јовановски, Ирена Ристиќ, Јордан Симонов, Искра Ветерова, Ѓорѓи Јолевски, Борче Начев, Магдалена Ризова-Черних, Гораст Цветковски, Славиша Кајевски, Александар Ѓорѓиоски Емил Рубен, Никола Ацески, Александар Микиќ, Трајче Георгиев, Дарја Ризова и Арна Шијак ја сочинуваат актерската екипа, костимографијата е на Никола Ефтимов, а сценографијата на Мери Георгиевска.