„ФИРОМ реквием“ е насловот на концертот на македонскиот композитор Александар Пејовски што ќе се одржи вечерва во Младинскиот културен центар.
Ова е премиерна изведба на четири нови дела и, според авторот, музичко-идеолошки омаж на американскиот и источноевропскиот минимализам од 70-тите години на минатиот век.
„Музиката не мора нужно да пренесува некаква порака. Иако има влијание од дневната политика, сепак е тоа направено со една цинична, иронична дистанца. Не станува збор за заземање некаков политички став“, вели композиторот за насловот на своето дело.
Во изведбата учествуваат Женскиот младински хор и камерен оркестар под диригентство на Сашо Татарчевски, а ќе бидат користени и ленти.
Александар Пејовски како млад композитор беше препознаен во странство, уште во 2004 година кога ја добива првата награда за оригинална композиција и аранжман на Барга џез фестивалот во Италија. Во 2006 година, со својата композиција „Хаикјуб 575“ беше избран во потесна, интернационална селекција на „Токио косеи винд оркестар“, ансамблот кој потем неговото дело ќе го изведе во прочуениот „Фумон кан хол“ во Токио.
Пејовски е и добитник на наградата „Панче Пешев“ што ја доделува Сојузот на композитори на „Денови на македонска музика“.