Носителот на советничката група на СДСМ во Советот на општина Карпош, Иван Спировски, денеска демантираше дека постоел каков било обид од страна на Стевчо Јакимовски за некаква соработка со советничката група на СДСМ во Карпош.
Тој во изјава за новинарите пред општината праша – кој може после сите постапки на градоначалникот на оваа општина, Стевчо Јакимовски да му верува дека се грижи за граѓаните, кога единствениот негов мотив во политиката се личните и бизнис интереси.
Спировски рече дека вчера се потврдило тоа што за целиот тек на кампањата го говореле, па коалицијата меѓу Стевчо Јакимовски и ВМРО-ДПМНЕ се официјализирала и конечно станала јавна.
По изјавата за мeдиумите на Иван Спировски дека градоначалникот на Карпош Јакимовски направил каков било обид за соработка со нив, Одделениете за односи со јавност на Општина Карпош се огласи со соопштение:
Генералниот секретар Андреј Петров во свое интервју на телевизија на 22 април изјави дека ќе бидат опозиција во општина Карпош, а веќе вчера од официјалното соопштение на СДСМ, самите се изјаснија дека тие во Карпош ќе бидат „конструктивна опозиција“. Под притисок на своето членство, очигледно сега се премислуваат и даваат контрадикторни изјави. Доколку носителот на листа, Иван Спировски, не знае кој и какви преговори водел во неговата партија, може слободно да го праша претседателот на Општинската организација на СДСМ, Анте Поповски.
Инаку, во петокот, на 19 април, беше побарана првата средба со ОО на СДСМ на Карпош, за договор за натамошна соработка во општинскиот совет, која според нивно барање беше одложена и наместо таа вечер, требаше да се одржи во недела, 21 април, во 20 часот. Сепак, не дојде ниту до втора средба, во терминот што сами го посочија.
Повторно со барање до ОО на СДСМ беше договорено тие во наредните денови сами да закажат термин за средба на која би се договориле идните чекори и функционирањето на Советот и на телата. По десетдневни неуспешни обиди, за да се овозможи нормално функционирање на Советот на Општина Карпош, се пристапи кон преговори со втората советничка група од ВМРО-ДПМНЕ.
Од ваквите изјави станува евидентно дека во СДСМ партиските раководители не соработуваат или таму не се знае „кој пие, а кој плаќа“. Со тоа само се потврдува дека оваа партија е дефинитивно одвоена и од членството и од симпатизерите и од граѓаните.