Велешката полиција засилена со секторите за борба против дрога на МВР и Царинската управа, пресекоа меѓународен транспорт на наркотични дроги и запленија околу 67 килограми марихуана, со проценета вредност од околу 250.000 евра.
По добиени информации за можен транспорт на наркотични дроги, од страна на Единицата за недозволена трговија со дрога преземени се интензивни мерки за проверка и анализа, при што е дојдено до информации и утврдување на идентитетот на лицето кое е инволвирано во вршење на транспортот.
Веднаш по ова, полициски службеници од Отсекот за дрога при СВР Велес околу 15.30 часот на наплатна станица Отовица, во правец на Скопје, го запреле возилото „фолксваген туран“ со скопски регистерски ознаки, управувано од Д.Ј.(46) од Скопје. Под сомнение дека со возилото се пренесува наркотична дрога, тоа е пренесено на граничен премин Блаце, каде од страна на тим од мобилна царина и со употреба на службено царинско куче, е извршен преглед и во возилото е откриен специјално направен простор-бункер во подот од возилото, вклучувајќи го и подот од багажниот простор, како и резервоарот од самото возило, кои биле исполнети со повеќе пакувања со марихуана во количина од околу 67 килограми, соопшти портпаролот на МВР, Сузана Прањиќ Талевска.
Сопственикот на автомобилот за паричен надомест од 2.500 евра требало со неговото возило да ја транспортира дрогата од Република Албанија, преку територијата на нашата земја, до Република Турција како крајна дестинација.
Денеска од страна на СВР Велес до надлежното ОЈО Велес ќе биде поднесена кривична пријава, а возачот на возилото ќе биде изведен пред судија од Основен суд Велес.