“Најзначајна претстава денес на просторот на поранешна Југославија, а веројатно и пошироко во Европа”- ова е поентата од рецензијата на Радио Белград 2, на Горан Цветковиќ, за претставата „Подемот и падот на Кабарето“ на режисерот Владимир Милчин, чија премиера беше изведена во саботата.
Рецензијата со наслов „Распеена историја на потресниот сарказам“ вели дека претставата е „вратоломна сложувалка на духот и на критичкото пресвртување на поимите, отворање на разноразни средби на ликовите на сцената, но и средби на тоа специфично сценско-музичко-поетско-драмско ткаење, со светот и моментот во кој живееме – не само ние сега и овде, туку и сите за кои сме учеле, од кои сме учеле, или кои сме ги мразеле и против кои сме се бореле“.
На сцената на МНТ се создаде „вистинска театарска магија – но не да нѐ магепса и да нè натера да потонеме во емоции, туку да нѐ разбуди и освести, за навистина да го согледаме светот во сите негови турбулентни пресврти“ пишува авторот Цветковиќ.
Радио Белград 2 дава блескава критика за делото на Милчин, за сценографијата на Крсте Џидров како и за актерите, за целиот ансамбл, кој игра модерно, освестено, соживеано, со дистанца од личниот момент, но со страст и со енергија и со одличен стил на игра. Со таа „актерска машинерија“ раководи раката на „театарскиот маг, режисерот Владимир Милчин“, создавајќи една навистина значајна претстава, пишува Цветковиќ.
Рецензијата за претставата на Милчин „Подемот и падот на Кабарето“завршува со зборовите „честитам“ и „браво“.