Денеска се очекува Централната изборна комисија на Косово да ги објави конечните резултати од вонредните парламентарни избори кои е одржаа на 8 јуни.
По признавањето на официјалните изборни резултати, парламентот на Косово треба во рок од 30 дена да одржи конститутивна седница. Официјално признавање на резултатите од изборите може да биде откако ќе завршат сите жалбени процеси на политички партии. Тој процес може да трае најмногу пет дена и поради тоа резултатите од изборите не може да се верификуваат пред 2 јули.
На првата седница на парламентот на Косово се очекува да се гласа за нов претседател на парламентот и пет потпретседатели. Напоредно со тоа, претседателската на Косово Атифете Јахјага треба да даде мандат на мандатарот за формирање влада. Мандатарот има рок од 15 дена да состави влада.
Според прелиминарните резултати на Изборната комисија објавени на 9 јуни, Демократската партија на Косово и лидерот Хашим Тачи оствари изборна победа со 30,72 отсто гласови. Следува Демократскиот сојуз на Косово со 25,72 отсто, а трети се Самоопределување со 13,51 отсто. Алијансата за иднина на Косово и лидерот Рамуш Харадинај добија 9,58 отсто гласови, а во парламентот на Косово влегуваат и Иницијатива за Косово со 5,24 отсто добиени гласови.