Про-руските сепаратисти кои заземаа неколку владини згради во источните предградија во Украина, ја одбија понудата од украинската влада за помилување, што предизвикува страв во земјата дека 48-часовниот ултиматум може да заврши со насилство.
Владата на Украина потенцираше дека нема да ги гони по судски пат сепаратистите доколку го предадат оружјето.
Барикадирајќи ги зградите со бодликава жица, тие велат власта мора најпрво да спроведе референдум за федерализација пред да ги напуштат објектите.
Владата истакна дека ќе заземе една од зградите во Луганск доколку демонстрантите не ги напуштат до крајот на денот, јавува Ал Џезира.
Во Доњецк пак, про-руските вооружени групи веќе ја прогласија областа за „надорна република“.
Во меѓувреме, рускиот јавен обвинител Јури Чајка денеска во Симферопол изјави дека отстранетиот украински претседател Виктор Јанукович нема да и биде испорачан на Украина.
Според Чајка, тој не извршил никакво злосторство за што би можело да му се суди во Киев.
Украинската влада побара екстрадиција на Јанукович, неколку денови откако тој ја напушти Украина. Тој е осомничен дека наредил стрелање на демонстрантите во Киев при што загинаа стотина луѓе.