МВР продолжува со потрерата по двајцата обвинети за несовесно работење во Македонски пошти, изјави министерката за внатрешни работи Гордана Јанкуловска.
„МВР обезбеди докази за 10 лица, и заради тоа кривичната пријава ги опфаќа овие 10 лица. Секогаш кога станува збор за кривично дело ние одговрноста ја бараме кај оние кои требало да ја обезбедат условите тоа да не се случи и се разбира кај директните извршители“, рече Јанкуловска.
На прашањето дали МВР има сознанија дека имало вакви пропусти во останатите грабежи на Македонски пошти, Јанкулоска истакна дека пред поднесување на кривична пријава не ги коментираат сознанијата и оти за последниот случај тие се презентирани откако пријавите веќе биле поднесени.
Министерството за внатрешни работи до Основното јавно обвинителство поднесе кривична пријава против 10 лица сите од Скопје, А.С.(31), З.Ј.(50), Г.А.(27), И.А.(40), Б.И.(32), Р. Џ.(29), Н.Б.(30), И.П.(41), В.Б.(48) и В.Т.(49), инаку сите вработени во АД „Македонска Пошта“ поради постоење основано сомнение дека сториле кривично дело “несовесно работење во службата” предвидено и казниво по член 353-в од КЗ на РМ.
Инаку, МВР трага по двете жени – едната сопруга на поранешен министер од редовите на ВМРО – ДПМНЕ, а другата ќерка на екс функционер од редовите на ДУИ.
Причина за апсењето е последниот филмски грабеж на поштата во Чаир на 26 Јули, кога двајца крадци украдоа 211 илјади евра и избегаа со веспи.