Во овие турбулентни глобални политички и економски времиња, економијата на Северна Македонија е мала економија и доста зависна од глобалната економија, овие економски параметри тешко може да се реализираат.
Дестан Јонузи / Фронтлајн.мк
– Предлог-буџетот за 2025 година предложен од Министерството за финансии е проблематичен за реализација. Економијата на Северна Македонија е мала економија и доста зависна од глобалната економија. Економијата на земјава е соочена со големи јавни долгови, а в година имаме и локални избори, вели меѓудругото во изјава за „Фронтлајн“ – Насир Селими – професор на факултетот за бизнис и економија при Универзитет на Југоисточна Европа, анализирајќи го усвоениот Предлог-буџетот за 2025 во Владата, кој се очекува да го помине собранискиот филтер пред новогодишните и божиќни празници.
– Предлог-буџетот за 2025 година предложен од Министерството за финансии претставува прилично амбициозен документ каде се очекува зголемување на приходите за 13%, расходите за 10%, дефицитот за 4%, инфлацијата за 2,7 и просечниот економски раст од 3,7 %. Во овие турбулентни глобални политички и економски времиња, економијата на Северна Македонија е мала економија и доста зависна од глобалната економија, овие економски параметри тешко може да се реализираат. Исто така, економијата на земјава е соочена со големи јавни долгови и со овој економски раст тешко може да се очекуваат поволни економски резултати. Одложувањето на интеграцијата на земјата во евроинтеграциите и влијанието на тоа врз развојот на локалниот бизнис и конфузијата на странските инвеститори. Ако на ова се додаде фактот дека во текот на следната година имаме локални избори, тоа уште повеќе ќе ги забави економските активности и негативно ќе влијае на реализацијата на зацртаните цели, анализира професорот.
Според него, секој буџет составен на почетокот на годината е амбициозен, со развоен карактер, со многу сериозност за развојни проекти, но подоцна истиот се намалува при прегледот.
– Ова беше искуството во изминатите години, подвлече тој.
Владата го усвои Предлог-буџетот за 2025 година кој носи стабилизација на јавните финансии и економски раст, со истовремена фискална консолидација.
Вкупните приходи во Буџетот се планирани на 358,838 милијарди денари што претставува 13% раст во однос на оваа година. Порастот на приходите се темели на поефикасна наплата и борба со неформалната економија. Вкупните расходи, се проектирани на ниво од 400,2 милијарди што претставува раст од 10% во однос на оваа година, додека дефицитот е на ниво од 4% или во износ од 41,350 милијарди денари и номинално е понизок за 3,3 милијарди денари во однос на оваа година.
Предлог-буџет за 2025 година ќе биде доставен на усвојување во Собранието.
Текстот е сопственост на Фронтлајн