Независна република прогласија проруските сепаратисти кои ја презедоа контролата врз зградата на провинциската управа во градот Донецк во источна Украина.
Активистите бараат најдоцна до 11 мај да се одржи референдум за отцепување на регионот Донецк што граничи со Русија, јавува агенцијата Интерфакс.
На снимката објавена на Интернет, непознат проруски активист во седиштето на провинциската влада во Донецк бара од рускиот претседател Владимир Путин да испрати мировни сили во регионот.
“Без вашата поддршка, без поддршката од Русија, ќе ни биде тешко сами да пружаме отпор на киевската хунта”, порачува тој, алудирајќи на привремената влада што дојде на власт откако во февруари беше симнат од власт претседателот Виктор Јанукович кој имаше поддршка од Москва.
Украинскиот премиер Арсениј Јаценјук вчера ја обвини Русија дека стои зад немирите што завчера избија во источните краеви на земјата и дека сака да предизвика нестабилност како оправдување за распоредување војници преку границата.
“Планот е да се дестабилизира ситуацијата, планот е странски војници да ја преминат границата и да преземат контрола врз територијата на земјата, нешто што ние нема да го дозволиме”, рече тој, додавајќи дека луѓето вмешани во немирите зборуваат со карактеристичен руски нагласок.
Јаценјук нагласи дека руските трупи и понатаму се наоѓаат на 30 километри од границата.