Нуркачите ја пронајдоа и третата црна кутија на рускиот воен авион кој се урна во Црното Море во неделата, објави агенцијата ТАСС. Полициски извори за агенцијата изјавија дека снимката е оштетена, но не ја исклучуваат можноста да се извадат дел од податоците.
Црната кутија се наоѓала во опашката на авионот. Досега од урнатиот авион се извадени 19 тела и 239 делови од тела, како и повеќе од 1.800 делови на авионот. Двете други црни кутии беа пронајдени во претходните два дена.
Директорот на службата за безбедност на летови на руското Воено воздухопловство Сергеј Бајнетов изјави дека на телата на патниците и на остатоците од авионот не се пронајдени траги од оган, ниту од експлозии.
Тоа ја исклучува можноста терористички акт како можна причина за несреќата, во која загинаа сите 92 патници и членови на екипажот, рече Бајнетов.
Дешифрирањето на црните кутии со податоците од авионот на руското Министерство за одбрана, кој се урна со 92 патници во неделата во Црното Море, по полетувањето од Сочи кон Сирија, би можело да потрае уште неколку недели.