Ф.К. Брегалница не се продаде. И натаму останува во рацете на локалната самоуправа. Денеска во 11 часот требаше да се отворат понудите доставени на јавниот повик за отуѓување на клубот, но постапката пропадна поради процедурални пропусти.
„ Општина Штип огласот на нашата интернет страна и во весниците го објави само на македонски јазик. Според законот требало да биде распишан и на англиски јазик. Постапката ќе биде повторена во најскоро време“, изјави за НОВА портпаролот на општината, Драган Ристов.
На првиот оглас била доставена само една понуда, која не се отворила поради законските пропусти. Комисијата одлучила пликот да остане затворен и понудата да остане запечатена се до повторување на постапката. Кој е заинтересираниот купувач на Брегалница засега останува во сферата на шпекулациите.
НОВАТВ неколку пати пишуваше за отуѓувањето на овој фудбалски клуб и објави дека бизнисмен од Турција веќе му фрлил око. Кон крајот на август во Штип пристигна и тренер од Турција, Јуксел Јесилова, кој донесе и пет нови фудбалери. Но, засега нема абер од продажбата.
ФК Брегалница е во стопроцентна сопственост на Градот. Вредноста на клубот е проценета на 25.000 евра или 10 евра по акција и обврска за идниот газда од минимум годишно вложување од 300.000 евра за период од една деценија.