Иницијативата „Канцерогено општество“ денеска пред Собранието организираше протест против аерозагадувањето, кој заврши пред Владата.
„Ставете налепници на тешката индустрија“, „Стоп за труењето на децата – нашата иднина“, „Нè угушивте, нè умревте и нe лажете“, „Наместо точаци купивме инхалатори“, беа дел од транспарентите истакнати на протестот.
-Ни здодеа да бидеме на улици и да ја бараме правдата, но размислете за едно, има деца, мајки трудници, кои дишат. Тие не се уморени, туку се чудат зошто не можат да видат сонце, зошто гледаат само темнила. Додека се трошат пари на маски и лекови и се полнат болниците со пациенти со респираторни проблеми, редно време е политичарите да станат од своите фотелји и сериозно да се нафатат на креирање суштински мерки, вели Кристијан Узунов, „Канцерогено општество“.
Не може со 1.5 милион евра буџетски средства да го исчистите најзагдениот град во светот, а вашите патни трошоци да бидат два милиони евра годишно, порачаа од иницијативата.
Апелираа до сите еко-активисти и експерти и понатаму да бидат гласни во борбата со ПМ10 честичките бидејќи не смее повеќе да се губи време.
Барањата се граѓаните се веднаш да се свика итна владина седница поради алармантната состојба на квалитетот на воздухот во државата, која ќе вклучува експерти, доктори, еколози, еко-активисти и сите кои реално би помогнале за подобрување на состојбата, а Владата да ги употреби сите потребни средства за справување со проблемот.
-И мало дете знае кои се загадувачите, од Железара гледавме црни обаци, а луѓето седеа дома и велеа ништо не е, еве сме сега после 4 години најзагаден град во светот, има уште многу такви, знаеме што се случува во Тетово, Велес, знам тоа не се единствени загадувачи но мора од некаде да се почне. Дајте им пари на луѓето и нема да мора гуми да палат за да се греат, рече Кристијан Узунов.