Да се врати паркингот во владение на Клиничкиот центар, а советниците на Град Скопје да ја повлечат одлуката со која цената на паркингот на вработените се зголеми од 300 на 800 денари. Своите барања тие ќе ги достават до сите надлежни институции. Ова денеска го побараа вработените на скопските клиники кои масовно излегоа на протест за време на паузата.
Претседателот на Синдикатот Горан Беговиќ најави дека доколку Градот не ја повлече оваа одлука од утре ќе ги блокираат наплатните пунктови на ЈП „Градски паркинг“.
„Овој простор е на Република Македонија, не знам зошто со него стопанисува Градски паркинг. Дојде време да си го добиеме тоа што е наше. Значи не станува збор само за зголемување на цената за паркирање. Сепак, тука има и вработени кои имаат многу помали плати и кои едвај и оваа цена ја плаќаат така што цела плата ќе им треба за платат паркинг за цела година,“, вели Беговиќ.
Вработените кои денеска се сплотија и во огромен број излегоа на протест, велат дека со зголемување на цената на паркингот за вработените нема да се реши хаосот со паркирањето во Клиничкиот центар. Револтирани се од вчерашната изјава на Шилегов дека луѓето болни умирале на паркинг од возилата на вработените.
„Дали знае градоначалникот Шилегов колку ние значиме за градот и државата, дека е ова срцето на Скопје. При сите несреќи, сите вонредни состојби ние сме 24 часа мобилни и ние сме тие што го чуваме мирот и стабилноста. Бараме извинување од градоначалникот Шилегов“, изјави Ѓорѓи Петревски, медицински техничар од Клиниката за неврохирургија.
Јулијана Јовановска, медицинска сестра од Клиниката за детски болести рече дека реагираат и ќе реагираат на сите небулози од претходната и од оваа власт.
„Навредени сме од изјавата на градоначалникот Шилегов. Ние функционираме на повик и замислете да се возиме со автобус за да стигнеме итно на работа. За хаосот во Клинички не сме виновни ние, тоа треба да го средат надлежните“, изјави Јовановска.
Иницијална каписла е изјавата на Шилегов. Клинички е непристапен, ние оаѓаме на работно место, а нема каде да се паркираме, рече Ивица Апостолов медицински лаборант Клиничка биохемија.
„ Дневно во Клинички влегуваат по 3000 возила. Едно амбулантно возило од Штип доаѓа за 45 минути, а за влез до соодветната Клиника чека 25 минути. Ако досега од нас за тие 1500 места се собирале 110 000 евра годишно, сега таа сума ќе биде 275 000 евра. Катна гаража е решението, но не можат вработените и пациентите да ја градат катната гаража“, изјави Апостолов.
Хаосот на Клинички центар е секојдневие. Возилата тешко влегуваат и излегуваат, а особено е проблематичен влезот на возилата за Брза помош.
Од Министерството за здравство пред еден месец најавија дека со Град Скопје ќе отворат уште два излези од Клинички, две улици од еднонасочни да станат двонасочни, да се обезбеди посебна лента за влез на возилата на Брза помош и изградба на две катни гаражи.