Протести и блокади на улиците Имаше во повеќе градови низ државата. Во Скопје, Куманово, Дебар, Битола, Кичево граѓаните излегоа на улиците револтирани од поскапувањето на струјата за 7,4 проценти. Во Скопје беа блокирани две крстосници во центарот на градот, додека во Тетово и Гостивар ги блокираа автопатиштата. Се бара национализација на ЕВН, укинување на Регулаторната комисија и на нејзино место формирање на друго комисиско тело.
Во Битола граѓаните носеа транспаренти со симболични пароли „Нè отепа струјата“, алудирајќи на поскапувањето на струјата. Протестираа низ Широк Сокак почитувајќи ги протоколите за заштита од Ковид-19, со маски на лицата и меѓусебна дистанца.
На протестот во Кичево беа вклучени голем дел од месните заедници на општина и многу други граѓани без политички обележја, иако поголемиот дел на локалните политички структури отворено дадоа поддршка на иницијативниот одбор за протести против поскапувањето на струјата.
Организаторите на протестот, кој се одвиваше под мотото „И Кичево протестира против ЕВН”, посочија дека се организира како реакција на поскапувањето на струјата.
Група гостиварци вечерва протестираа движејќи се во колона по магистралниот пат Гостивар – Кичево. Двесетината возила тргнаа од наплатната станица на автопатот „Мајка Тереза“ и возеа до крстосницата со семафор за Кичево и село Здуње. За време на протестот, сообраќајот по оваа делница, долга два километра, се одвиваше забавено и полицијата го регулираше минувањето на останатите возила.
Пред тргнувањето протестирачите искажаа незадоволство од одлуката на Регулаторната комисија за енергетика за зголемувањето на цената на електричната енергија за 7,4 проценти.