Зборови на надеж или само затишје пред поголемо невреме. Светски медиуми известуваат дека по вчерашниот драматичен и крвав ден, во Киев ноќта помина без насилство. И додека поголемиот дел од светските медиуми известуваат дека по цело вечерните преговори со претставници на Европската Унија постигнат е договор, на Твитер новиот “ринг“ за разменување информации, се повеќе вријат информациите дека опозицијата и демонстрантите нема да го прифатат новиот договор и остануваат на барањето оставка на Јанукович и негово ставање на обвинителната клупа.
На социјалната мрежа се огласил и германскиот Министер за надворешни работи со порака дека двете страни ги одложиле преговорите за подоцна во текот на денот. Овие информации ги потврдил и францускиот преставник во договорите, кој соопштил дека на опозицијата и е потребно време да ги консолидира своите редови. Додека пак Ал Џезеира известува дека Јанукович, ја губи својата моќ пред опозицијата особено по вчерашните крвави пресметки, за кои Западот вината ја бара во власта.
Дека мир не е постигнат потврдуваат информациите на киевската полиција, според која демонстрантите утрово во 10 часот отвориле оган врз полицијата. Инцидентот се случил во Киев помеѓу Плоштадот на независноста и зградата на парламентот. Полицијата возвратила.
Иако украинската телевизија, само половина час пред тоа објави информации дека новопостигнатиот договор предвидува предвремени претседателски избори, коалициона Влада и промени во Уставот, европската страна не открива детали бидејќи според нив конечен договор не е постигнат.
Иако се погласни се гласините, дека со новонастанатата состојба, во борба против демонстрантите би можела да биде пуштена и украинската војска, аналитичарите тврдат дека е малку веројатно дека војската ќе го нападне сопствениот народ. Во прилог на овие тврдења сепак не одат вчерашните официјални бројки според кои повеќе од 100 лица го загубиле животот, кога полицијата отвори оган врз демонстрантите.
Американскиот потпретседател Џо Бајден, во вчерашниот разговор со украинскиот претседател, го советувал да ги повлече силите и да покаже воздржаност во решавање на проблемите.
Она што е сосема видливо, пишува Ал Џезеира, е тоа дека и по вчерашниот крвав ден во Украина е тоа дека постои поделеност на земјата. Западните градови се оние кои покажуваат отворен револт кон владеењето на Јанукович, додека голем дел од источна Украина го подржува Претседателот и сеуште одржува цврсти врски со Русија, нивниот поранешен советски владетел.