Односите Русија-САД се поважни од „спорот во врска со активностите на тајните служби“, порача денес Владимир Путин. Посетата на Обама во Москва е ставена под прашање.
Рускиот претседател Владимит Путин изјави дека билатералните односи со САД се поважни од „активностите на тајните служби“, што се однесува на поранешниот разузнавач Едвард Сноуден.
На прашањето дали „аферата Сноуден“ ќе го стави под прашање САД-Русија самитот планиран во септември во Москва, Путин на новинарите им одговори: „Моето мислење е дека билатералните односи се далку поважни од споровите околу изјаснувањата на Сноуден“, пренесува агенцијата Ројтерс.
Вчера, Едвард Сноуден, кој речиси три недели се наоѓа на транзитната зона во московскиот аеродром „Шереметјево“, поднесе и официјално барање за привремен азил во Русија, што беше потврдено од страна на рускиот адвокат Анатоли Кучерен.
На состанокот со активистите за човекови права во петокот, Сноуден изјави дека неговото барање е поради фактот што сеуште не може да најде начин да отпатува во Латинска Америка. Досега Венецуела, Боливија, и Никарагва беа достапни за неговите барања.
Според рускиот претседател, токму САД го блокираат неговото заминување од Москва.
Од друга страна, американската администрација бараат враќање на Сноуден во САД со цел да му се суди за „шпионажа“.
„Сноуден треба да биде депортиран од Русија и вратен во САД“, изјави портпаролот на Белата куќа, Џејмс Карни, бидејќи според САД, Сноуден „не е активист за човекови права, ниту пак дисидент“.