Покрај администрацијата на општина Карпош, како донатори во кампањата на Стевче Јакимовски се јавуваат и архитектите Игор Василевски и Вангел Караиванов, и двајцата дел од многу идејни решенија за градби и реконструкции во општината. Исто така, нивните имиња фигурираат и на ФБ страницата „Креативен тим на општина Карпош“.
Во разговор со НОВА градоначалникот Стевче Јакимовски на прашањето дали е точно дека архитектите чии идејни решенија победуваат на конкурси во општината со која тој раководи се јавуваат и како донатори, тој вчера по извесен молк на телефонската линија кусо и отсечно одговори дека „нема такво нешто“.
Архитекотот Игор Василевски, пак во разговор со НОВА прво потврди дека е донатор во кампањата, потоа се предомисли па рече дека не е донатор, за на крај во СМС порака да ја откаже закажаната средба и да пише дека нема обврска да одговори.
Игор Василевски и Вангел Караиванов се автори на идејните решенија на новиот плоштад во Карпош помеѓу краците на Влае1, Влае 2 и Порта Влае, потоа на реконструкцијата на плоштадот кај Млечен ресторан, реконструкција на згради и фасади во општината, идеи за пепелници и слично. За кампањата на Јакимовски и двајцата донирале по 25.000 денари.
Во видеото кое е дел од овој текст можете да ја погледнете анимацијата која е постирана на групата „Креативен тим на општина Карпош“ каде и тие се водат како дел од тимот, а содржината на видеото се однесува на плановите за градби и реконструкции на општина Карпош до 2019 година.
Освен имињата на двајцата архитекти, на списокот на донатори се јавуваат речиси сите раководители од општина Карпош, секратарот на општината, како и други вработени на други позиции. Раководителите вчера потврдија дека донирале средства за општината.