Двајца работници со голема среќа случајно се спасиле од катастрофалната експлозија во фабриката за муниција во бугарското место Горни Лом, каде загинаа 15 луѓе.
Според истрагата, еден од вработените вчера не се јавил на работа, додека друг ја заборавил личната карта и бил вратен од работното место.
Во моментот на несреќата во фабриката имало 12 работници и три лица од управата на компанијата. Шефот на цивилната одбрана Николај Николов соопшти дека спасувачките тимови ќе можат да извршат инспекција на местото на несреќата дури 24 часа по експлозијата, кога ќе се знае точниот број на загинати.
Пред извесно време во фабриката во Горни Лом работеле 120 лица, но во 2010 година тој број бил намален на вкупно 50. Од нив, 15 се верува дека биле во кобната смена кога се случила експлозијата.
Според работниците условите за работа во фабриката биле многу лоши, а и инспекциските служби потврдија оти компанијата-сопственик неколкупати била казнувана за непочитување на работничките права и прописите за заштита при работа.