Интерпелацијата за министерот за здравство Никола Тодоров која ја поднесе опозицијата влегува во завршна фаза. Кај пратениците има нервоза по 11 часа поминати во собраниската сала во која се одвива расправата за оставка на Тодоров. По паузата и консултацијата на претседателот на Собранието на Трајко Вељановски со координаторите на двете партии , на говорница излезе Рената Десковска.
„ Не слушнавме ништо од министерот освен занаетчиско- градежни работа во болниците. Во здравството има системски проблем. На крајот на денот да потсетам на министерот за здравство во Црна Гора кој за едно починато д ете си даде оставка, по пожарот во дискотеката во Романија министерот си даде оставка, само министерот Тодоров не си поднесе оставка за повеќе смртни случаи, за штетниот тендер „Визарис“. Пред неколку години тој исто така не си поднес е оставка заради негативната оценка на Државниот ревизорски извештај. Денеска моите колеги изнесоа многу и причини зошто треба да си замине Тодоров. Зошто пристапот до примарна заштита е намелен за 80 проценти, зошто здравството е во хаос. Наместо тоа Тодоров ќе биде запаметен што по судски пат забрани штрајк, а потоа со најстрашни методи се пресмета со лидерот на тој штрајк.Тој ги уништува противниците, тоа е класичен сталинизам, рече Рената Десовска од СДСМ.
На говорницата реплицираше министерот за здравство Тодоров.
„Почитувана пратеничке дали за вас е градежно- занаетчиска работа државната кардиохирургија или детската кардиохирургија, новиот акцелератор, интервентната кардиологија, намалувањето на цената на лековите . Дали е занаетчиска работа што е изградена нова болница во Козле или реконструкцијата на болницата „8 септември„ или гасификацијата на Клинички центар. Не е, но вие мора да нападнете по секоја цена. Оној Центар Мумбао е најрелевантен за вас за статистика, тоа се всушност нерелевантни истражувања. Македонија е на 16 место во Европа, реплицираше Тодоров.
„Зградите не ги лечат пациентите министре , вие сте без идеја, набавувате опрема по повисока цена, без план, а вас ви е важно само да имате тендери, реплицираше Десковска.
Ѓорѓи Коџобашија од ВМРО ДПМНЕ рече дека Влада на ВМРО ДПМНЕ воведе реформи и тоа е приоритет .
„Состојбите не се розови но оваа Влада вложува многу. Вие вложивте едвај 4- 5 милиони евра за реконструкција. Во Велес во време на СДСМ немаше специјализации,а сега има 26 специјализации, има набавена апаратура“, рече Коџобашија.
„Немојте да заборавите дека сте 10 години на власт, па не е успех ако сте реновирале згради. Вие имате системски пропусти, треба да се исправи таа системска грешка, а вие браните еден неуспешен министер. Жал ми е што наместо министер за здравство имаме министер за смрт, а долговите се се поголеми во здравството“, реплицираше Десковска.
Во обрана на министерот се јави и пратеникот Андон Чибишев.
„Очекував посуштинска дискусија на толку проблеми во здравството. Го критикувате министерството за здравство, погледнете го регистерот за опрема. Во последните 4 години е набавена најсовремена опрема. Не е точно дека примарната заштита не е достапна, а државната кардиохирургија е реалност, рече пратеникот Андон Чибишев од ВМРО ДПМНЕ.
„Да морам да се сложам дека има проблеми во здравството како што рековте, а суштински проблем е кога ќе почине дете, кога ќе почине родилка, рече Десковска.
Таа го запраша Тодоров каде е Клиничкиот комплекс, таму се уште стои само дупка откако пред две и пол години беше урната старата зграда на гинекологија.
Расправата продолжува до полноќ кога треба да се гласа за или против оставка на Тодоров.