Преговорите меѓу Украина и Русија за гасот, со посредство на Европската унија, завршија синоќа во Киев без резултати и без договор.
Портпаролот на рускиот „Газпром“ Сергеј Купријанов изјави дека со оглед на тоа што Русија и Украина не успеале да го решат спорот околу цената на гасот, рокот кој Москва му го постави на Киев да гп плати долгот од 1,95 милијарди долари, истекува денеска.
– Ако дотогаш Киев не го исплати долгот, Москва би можела да го прекине снабдувањето со гас на Украина, што може да предизивка и прекин на протокот на гас во Европската унија, додаде тој.
На разговорите учествувале еврокомесарот за енергетика Гинтер Јотингер, украинскиот премиер Арсениј Јацењук и директорот на рускиот „Газпром“, Алексеј Милер. Состанокот е одржан во момент кога Украина е во национална жалост поради убиството на 49 војници.