Асоцијацијата на архитекти на Македонија (ААМ) испрати реакција во однос на деталниот план за Мал Ринг до градоначалникот на Општина Центар, Саша Богдановиќ и до претседателот на Советот на Општината, Цветанка Симоновска.
Реакцијата ја пренесуваме во целост:
Асоцијацијата на архитекти на Македонија (ААМ) остро реагира и бара да го повлечете и преработите Предлог – Детaлниот урбанистички план за градска четврт Ц01 – Мал ринг 1, Општина Центар Скопје, за кој е закажана јавна презентација и јавна анкета на 22.07.2020 година (среда) во 10.00 часот.
Причината заради која бараме да го повлечете предлог-планот е едноставнa. Во планот се планирани истите објекти кои беа спорни и во претходниот криминален план со кој беше овозможена изградба на објектите од таканаречениот проект „Скопје 2014“.
Како најголемо здружение на архитектите во Република Северна Македонија, ААМ се залагаше за институционална ревизија на проектот „Скопје 2014“ и институционално справување со насилниот чин на промена на централното градско подрачје. Но, тоа не го дочекавме. Напротив, со овој предлог план вие давате институционална потврда и реафирмација на изградениот, но што е уште
пострашно и на неизградениот дел од проектот „Скопје 2014“.
Нашата зачуденост е уште поголема бидејќи на 17 декември 2017 година донесовте одлука, која сè уште важи, за мораториум на градба во општината додека сите планови кои сметате дека се лоши не се ревидираат. Новите ревидирани планови ги носите по приоритет, притоа условите за приоритетот по кој се носат плановите никогаш не ѝ беше соопштен на јавноста. Бидејќи овој план е повеќе од 90 отсто реализиран, ААМ подразбира дека приоритет ви е изградба на Споменикот Мајка Тереза (поставен врз ул. „Орце Николов“), т.н. Шпански скали, потврда на додадениот трем на Стоковната куќа НАМА од арх. Славко Брезовски и потврда на статусот на заштита на Спомен куќата на Мајка Тереза и Триумфалната порта, и со тоа конечно завршување на проектот „Скопје 2014“.
ААМ секогаш имала разбирање за деталните планови каде има комплицирани имотно-правни односи и секогаш се залагала за оптимално решение. Но, овде станува збор за објекти и земјиште во државна сопственост и објекти кои во својата срж, во најмала рака се спорни, поради што сметаме дека за ваков предлог-план нема потреба од јавна презентација и јавна анкета пред спорните објекти да бидат исфрлени од планот. Јавна презентација на ваквиот планот беше веќе еднаш направена кога се презентираше проектот „Скопје 2014“ во 2010 година.
Како дообјаснување на ставот на ААМ во врска со овој план во прилог Ви го доставуваме писмото од Вонредното собрание на ААМ, одржано по повод проектот „Скопје 2014“, кое во 2010 година беше испратено до тогашниот премиер Никола Груевски.