Весникот „Ла Верита“, кој ги објави снимките како зборуваат Орце Камчев и Боки 13, а се имплицира вмешаност на поранешната специјална обвинителка Катица Јанева во случајот „Рекет“, се смета за близок до есктремно десничарската партија „Лига“, која ја предводи доскорешниот министер за внатрешни работи на Италија, Матео Салвини. Весникот според уредувачката политика тежнее кон радикалната десница, а низ текстовите постојано ги напаѓа политичките неистомисленици. Од своја страна пак, екс- министерот Салвини не го крие пријателството со унагрскиот премиер Виктор Орбан, заштитникот на Никола Груевски при криењето во Будимпешта, политичкиот азил и бегањето од затворската казна во Скопје.
Ако се поврзе релацијата на Орбан со Салвини, но и со таа со Груевски, а потоа врската на Салвини со уредништвото на весникот, тогаш е појасно зошто „Ла Верита“ ги објавува снимките, документите и информациите од Македонија и како со тоа сака да и отвори простор за манипулации на ВМРО ДПМНЕ.
Во поширок контеkст радикалната десница се шири и преку Москва. Имено, познато е дека Салвини негува добри односи со рускиот претседател Путин, дури се објави дека Русија финансиски ќе ги помогне партиите низ Европа, со десна ориентација, со цел да се создаде пандан на европските демократии, како еден вид нова Европа со доминација на десничарите.
Неодамна, порталот 360 степени објави дека авторот кој се потпишува на текстовите е Лорис Гајсер, Словенец со италијански пасош. Тој е претседател на Паневропското движење на Словенија, дел од претседателството на меѓународната Паневропска Унија. Заедно со него, во претседателството на оваа организација е и доскорешниот македонски амбасадор во Брисел, Андреј Лепавцов и советник на поранешниот премиер Никола Груевски.
Оваа релација на советникот Лепавцов со Гајсер е уште еден податок кој ја расчистува маглата зошто италијанскиот весник е во мисија да скандализира случаи, а на домашна сцена ВМРО ДПМНЕ да ги користи за напад врз власта.
Весникот „Ла верита“ на позицијата главен уредник има контроверзен новинар во ликот на Маурицио Белпјетро, претпоставениот на Гајсер.
Кариерата му почнува во локални медуими во родната Бреша, работел како презентер на италијанската телевизија Канал 5, па се до угледната „Панорама“, но таа му е исполнета и со низа контроверзи и судски случаи против него. Во 2009 година, Белпјетро е правосилно осуден за клевета на доктор во случајот на познатиот италијански активист, уметник и политичар Пјерџорџо Велби. Истата година, тој е под истрага во Јавното обвинителство во Рим за клевета и навреда на тогашниот Претседател на Италија, Џорџо Наполитано.
Истата година, заедно со Роберто Сандало (поранешен член на паравоената организација Прима Линеа) е осуден за клевета и претставување на лажни и измислени информации како вистински, односно пренесување на интервју на Сандало во кое клеветат луѓе за напади на верски објекти и убиства. Во 2011 година, Белпјетро повторно е предмет на истрага, овојпат на Јавното обвинителство во Милано за изречена тешка клевета и навреда на претседателот на Италија, Џорџо Наполитано. Во 2015 година, нему заедно со колегата Џанлуиџи Нуци им е определен притвор од 10 месеци за тешка навреда.
Весникот „Ла верита“ излегува за првпат во 2016 година, во споственост на „Ла верита СРЛ“ друштво со органичена одговорност, каде што не се знае потеклото на основачкиот влог, проценет на два до три милиони евра.
Целиот овој состав на личности и релациите помеѓу нив го отвораат сомнежот како „Ла Верита“ се најде во фабриката за лажни вести.