Решението за лекување во странство на Тамара семејството го добило вечерва

Вистински шок преживеало семејството на малата Тамара, кога попладне околу 17 часот во нивниот дом во Велес, стигнало Решение од Фондот за здравство со кое и се одобрува лекување на Тамара во странство. Иронијата да биде поголема Решението е испратено на 11 февруари, два дена откако почина малата Тамара, а одлуката е донесена на 6 февруари, три дена пред да почине.

Потписници на документот се претседавачите на двете комисии, на Првостепена Викторија Чаловска и на Второстепена комисија Анастасика Поповска, како и двајцата директори на Фондот Маја Парнаџиева Змејкова и Џемаил Мехази.

„Гневна сум, поголема иронија во животот немам доживеано. Не и дозволија да се лекува, а сега ја вознемируваат и почината. Што да правам со решението на гробот ли да и го однесам“ со растреперен глас и видно вознемирена вели Жаклина, мајката на Тамара за НОВА.

Дали станува збор за сурова грешка или во Фондот се обидуваат да ги запазат законските процедури во случај на тужба од страна на семејството, останува да се види. На ова прашање НОВА очекува одговор во текот на утрешниот ден бидејќи е доцна навечер, а службите во Фондот не работат.

Откако семејството апелираше за помош во медиумите, министерот Тодоров рече дека ќе се заложи за случајот и вети дека Тамара ќе отпатува на лекување во странство. Но, само усно.

Решението во домот на Тамара стигна вечерва, но премногу доцна, четири дена по нејзината смрт. Ова е Решението испратено од Фондот за здравство со кое се одобрува лекување на веќе починатата Тамара во Турција.






Инаку, откако почина малата Тамара Фондот за здравство ја забрза постапката за уште две деца со тешка форма на деформитет на ‘рбетот кои чекале за лекување во странство. Одлуката Второстепена комисија ја донела на вчерашниот состанок. Нивните родители телефонски биле известени дека имаат позитивно решение и тие во секој момент очекуваат документ по што ќе заминат на операција во Турција.