Има напори од страна на меѓународнатa заедница за поддршка на Грција и Македонија во однос на решавање на прашањето за името, вклучително и од САД. Ние сакаме тоа да се случи и даваме поддршка на овие напори, иако не можеме да донесеме одлуки за нив. Не можеме ние да постигнеме договор за овие земји, тоа е нешто што Грција и Македонија треба да го сторат заедно, изјави заменик-помошникот на државниот секретар на САД задолжен за земјите од Западен Балкан, Филип Рикер, што го истакна на денешниот брифинг во Брисел.
– Нимиц даде нов предлог. Да, се согласувам дека ниту еден предлог не е перфектен, но поентата од предлозите е тие да се искористат како база за ангажман и преговори за да се најде решение. Примерот со Белград и Приштина од тоа како ЕУ го олеснуваше дијалогот, треба да се искористи како база околу која се придвижуваат работите напред. Другите треба да најдат решение на своите проблеми и несогласувања. Во однос на Србија и Косово, Европскиот совет јасно презентираше во заклучоците на Самитот во декември што треба да се случи за процесот да се движи напред. На таа база двете страни работеа низ дијалогот. Нимиц претстави предлог, кој може да се искористи од Грција и Македонија да најдат решение и како што и од ЕУ истакнаа многупати досега, и ние во Вашингтон, сите се надеваме дека ќе го сторат тоа – посочи првиот човек на американската администрација задолжен за Западен Балкан.
Рикер изјави дека имало редовни консултации за да се обиде меѓународната заедница Македонија да се придвижи напред.
– ЕУ и комесарот Филе работат екстремно напорно по настаните во декември 2012 година, вклучително и на договорот од 1 март, за да се обидат да се справат со проблематичните настани во Собранието на Македонија и гледам придвижување во однос на тоа прашање и ќе гледаме што ќе излезе од сето тоа. Ние ќе продолжиме да ги повикуваме двете страни, Македонија и Грција, да ја искористат оваа можност, да се фокусираат на тоа што е вистинско прашање, а не да бидат вовлечени во прашања што никогаш не ни биле вклучени. Нашата порака и надеж е дека ќе видиме прогрес во таа насока. Секој чекор е важен и се надевам дека ќе има наскоро промена во ова, оти поминаа многу години и сакаме да видиме Македонија да не стагнира во време кога регионот се движи напред – дециден е Рикер.