Регулаторната комисија за енергетика (РКЕ) објави Одлуката за одобрување на цената на ЕВН Хоум, според блокови и коефициенти на поскапување, во рамки на новиот тарифен систем.
Домаќинствата кои трошат до 210 киловатчасови, според приложените табели, ќе имаат незначително финансиско олеснување во однос на вториот блок и ќе плаќаат само 0,1 отсто поевтино. Цената за нив ќе биде 4,35 денари од киловатчас.
Во вториот блок, кај домаќинствата кои трошат од 211 до 630 киловатчасови, основната цена се множи со коефициент од 1.07 отсто, а цената што ја бара ЕВН Хоум е 4,7 денари по киловатчас потрошена струја.
Третиот блок ќе биде за 20 отсто поскап и по цена од 5,27 денари за потрошени киловати од 631 до 1.050 киловати. Но, затоа драстично ќе биде поскапувањето за домаќинствата кои трошат над 1.050 киловатчасови. Тие ќе плаќаат по 14 денари за киловатчас, односно поскапувањето за нив ќе изнесува цели 320 проценти. Ниската тарифа, односно евтината струја, останува по иста цена за сите од 0,62 денари по киловатчас.
Кај малите потрошувачи, односно кај фирмите и другите субјекти на регулираниот пазар, периодот на висока тарифа ќе се плаќа по 13,9 денари по киловатчас од 1 јули, односно за 314 отсто поскапо.. Скап ќе биде и периодот на ниска тарифа, ќе се плаќа по 10,11 денари по киловатчас и ќе биде повисоко за 230 проценти.