НБА ѕвездата од „Куќата на славните“, Денис Родман, денес се врати од својата четиридневна посета на Северна Кореја, но изјави дека е разочаран што овојпат не успеал да се види со тамошниот врховен лидер Ким Јонг-Ун, најавувајќи нова средба.
Ова беше третата посета на севернокорејската престолнина Пјонгјанг за Родман.
Пред заминувањето за Пјонгјанг, петкратниот НБА шампион најави дека четири дена ќе тренира со кошаркарската репрезентација на Северна Кореја. Тренинзите ги опишува како „лудница“.
Тој исто така најави дека сака да се врати во јануари во Пјонгјанг со група поранешни ѕвезди од НБА, и да организира кошаркарски натпревари. „Ќе играме за две седмици“, рече Родман.
Првиот престој на Родман во Северна Кореја беше непосредно откако таму беше изведен третиот нуклеарен тест, и покрај резолуцијата на Обединетите нации, што ги подигна тензиите на Корејскиот полуостров. По враќањето од Пјонгјанг, тој ја разбранува американската јавност фалејќи го младиот комунистички водач.