Рок од 48 часа и дадоа на Владата семејствата на затворениците за да се распише референдум за донесување на измени на Законот за амнестија. Тие бараат намалување на казните за 40 проценти, бидејќи затворите се пренатрупани, таму владеат нехумани услови.
Штрајкот со глад од денеска е прекинат, но незадоволството се сели на улиците.
„Мојот син е 43 дена во затвор, наместен е од полицијата и адвокатот. Невин е, боледува од психичка болест, лекар не сака да го прегледа. Син го купил телефонот за 500 денари, а тој што го украл и му го продал е на слобода. Осуден е на пет години затворска казна, а веќе осум години води борба со тешка болест. Се обратив до сите надлежни, никој не сака да помогне “ со солзи во очите раскажува Митревска Петра.
Најмногу се револтирани роднините на таксистите кои превезувале мигранти пред да се случат измените на законот, по што се осудени на високи затворски казни од по пет и повеќе години.
„Зошто нашите деца кои сакале да помогнат на мигрантите да бидат осудени на толку високи казни. Син ми е самохран родител, се качило некое семејство од бегалците, го осудија на пет години. Велат осуден е според некој член за криумчарење и препродавање органи, каква врска има превозот на бегалците со препродавање на органи„ рече Верка Златанова.
Семејствата на затворениците и Граѓанската иницијатива за донесување на предлог на Закон за амнестија и дадоа рок на Владата да го извести ДИК за да распише референдум со кој ќе соберат 10 000 потписи. Затворениците од пладне го прекинуваат штрајкот со глад во сите затвори во државата, но доколку до среда не се распише референдум, тие најавија блокирање на улиците и масовни протести.
„Доколку за 48 часа Владата не одговори позитивно , ние сме подготвени да ги блокираме улиците, со разни превозни средства, камиони, трактори. Ги замолувам да го прекинат штрајкот со глад, нивната борба продолжува сега овде“ рече пред присутните Мери Николова од Граѓанската иницијатива за донесување на Закон за амнестија.
Семејствата на затворениците бараат хумани услови во затворите. Во штипскиот затвор кој е со капацитет за 200 луѓе во моментот има 800 затвореници. Тие спијат на подот, во тоалетите. Корупцијата цвета во затворите, велат нивните блиски роднини.
„Се им носиме од дома, душеци, храна, вода. Синот ми е осуден на шест години, може да оди на домашно отсуство но, ете не го пуштаат. Нема правила во оваа држава, владее сиромаштија, народот го доведоа во ситуација да краде. Не ни треба оваа Влада“, рече еден татко, чиј син е во затвор додека во рацете го држеше својот внук.
Во затворот во Идризиво преадаптирани се шталите за говеда, кокошки, овци и таму сега спијат затворениците. Немаат медицинска нега. Во затворската амбуланта лежат 150 лица од кои 60 се донесени од психијатриската болница во Бардовци.