Германија, како претседавач со Европската Унија денеска ја стави дискусијата за проширувањето на дневен ред на Седницата на Советот за општи работи на ЕУ, која што ја води германскиот министер за Европа, Михаел Рот, објави Дојче веле на македонски јазик.
„Ќе ги информирам моите колеги за процесот на проширување со Северна Македонија и Албанија. Уште на почетокот на годинава одлучивме да ги започнеме преговорите со двете земји. Основен интерес на ЕУ е во најбрз можен рок да започнат преговорите со Меѓувладина конференција“, порачал утрово Рот пред почетокот на виртуелниот состанок на министрите.
Како што пишува Дојче веле, Рот рекол дека се надева оти сите земји членки ќе се согласат со оваа цел и ќе бидат подготвени прагматично и солидарно да работат за нејзино остварување.
„Проширувањето не смее да биде заложник на билатерални барања на одредени земји-членки“, рекол Рот, алудирајќи на бугарската блокада на процесот.
Бугарија секојдневно најавува дека нема намера да дозволи почеток на преговорите. Министерката за надворешни работи. Екатерина Захариева денеска пак изјави дека „за Македонија ќе има место во ЕУ кога ќе биде спремна, а ама сега не е“.