ЕУ со својата одлука да ги замрзне разговорите за визни олеснувања зазеде „екстремно неконструктивна позиција“, соопшти денеска (7.03) руското Министерство за надворешни работи. „Русија нема да го прифати јазикот на санкции и закани“, се вели од Москва и се нагласува дека доколку ЕУ навистина донесе заострени казнени мерки, Русија ќе се одмазди.
Шефовите на држави или влади на ЕУ вчера во Брисел се договорија за санкции против Русија. Меѓу другото, стопирани се преговорите за визни олеснувања, како и за нов договор за соработка со Русија. Германската канцеларка Ангела Меркел по вонредниот самит изјави дека доколку Русија во текот на наредните денови не се согласи со основање Контакт група, би можело да биде воведена забрана за влез во ЕУ за одговорни лица во Москва, како и замрзнување на сметки. Меркел не исклучи и можност за евентуални економски санкции.
Независно од најавените санкции на Западот, рускиот парламент денеска искажа отвореност за евентуално припојување на Крим кон Русија. Претседателите на двата дома на Парламентот изразија поддршка во случај населението на полуостровот на референдум да се одлучи за отцепување од Украина и припојување кон Русија.
„Доколку народот на Крим донесе таква одлука, ние тоа решение ќе го поддржиме“, изјави претседателката на горниот дом на рускиот парламент Валентина Матвјенко, додека првиот човек на Думата Сергеј Нарушкин рече дека парламентот „ќе ја почитува историската одлука на населението на Крим“.
Кримските пратеници вчера (6.03) го замолија рускиот претседател Владимир Путин за прием на Крим во Руската Федерација. Освен тоа беше донесена одлука за поместување порано на датумот на одржување на референдумот за иднината на Крим, односно беше одлучено тој да се одржи веќе на 16. март.
Украинскиот преоден претседател Олександер Турчинов најави дека ќе почне постапка за распуштање на парламентот на Крим. ЕУ и САД го осудија заклучокот на кримските пратеници за припојување кон Русија како „илегален“.
Сторијата е превземена од сервисот на македонски јазик на Дојче Веле