Руската црноморска флота постави ултиматум до украинските сили на Крим да се предадат до четири часот наутро, или во спротивно ќе бидат нападнати. Претходно, руски воени авиони го нарушија воздушниот простор на Украина, прелетувајќи над црното море, јавуваат светските медиуми.
>> Русија vs. Украина: Доколку избие војна украинската војска премала за руската
Русија го стави целиот полуостров под своја контрола. Двете украински воени бази на Полуостровот се под целосна блокада на руските трупи и на проруските паравоени групи.
Под опасада се и украинската поморска база, како и двата локални аеродроми. Бројот на руските војници на Крим е далеку поголем од оној на украинските сили и сите патни правци кон Украина се целосно затворени.
Привремениот украински премиер Арсениј Јацењук изјави дека заземањето на Крим нема да успее, но ја отфрли можноста од воено решение на сегашната криза.
– Крим е територија на Украина и покрај присуството на руската војска ние ќе го решиме овој проблем. Секој обид на Русија да го освои Крим, нема да има никаков успех во тоа, изјави Јацењук.
Русија и натаму одбива да го признае новото привремено раководство во Киев, отфрлајќи ја неговата легитимност.
Рускиот шеф на дипломатијата Сергеј Лавров ги отфрли обвинувањата дека Русија се однесува агресивно кон Украина и го обвини Западот дека своите геополитички калкулации ги става пред судбината на украинскиот народ.